కన్నీళ్లకు కన్నీళ్లు

ఎన్నిసార్లు అలిగినా గడపదాటనివ్వని స్వార్థం నాది
వాటి ఉనికిని కూడా ప్రపంచానికి చూపించడం ఇష్టం లేక
నా చేతులతోనే వాటిని వాకిట్లోనే చిదిమేసే క్రూరత్వం నాది
.
అంత కష్టపడి.. పుట్టిన ప్రతిసారి కడతేరుస్తున్నా ...
ఏమరపాటుగా ఉన్నప్పుడు
గోడదూకి పారిపోయే ప్రయత్నంలో
నా చేతికి చిక్కి గుప్పిట్లో నలిగిపోతాయి
ఎవరన్నా చూస్తారేమో అని తలుపులు మూసుకుని
తలపులని తరుముతున్నా....
మరపుకు రానివ్వను .. మెలకువ రానివ్వను
ఆగలేక తొంగిచూసిన మరుక్షణంలోనే
పైటకొంగుకి ఉరితీయబడతాయి
.
@Lakshmi

అచ్చం నాలానే ....

++++++++++++++++++
వెలుగుకు భయపడే నిజాలు కూడా ఉన్నాయి
అచ్చం నాలాగే ...
వెలుగును మాత్రమే చూడాలనుకున్నంత కాలం
అవి తెరవెనుక నీడలనే తేలిపోయినట్లుంటాయి
కాలంతో పరిగెత్తేప్పుడు ఆ నీడలే నీతోడు ..
.
అలసిన నాడు ఆదరింపు కోసం
ఏనాడైనా వెనక్కి చూస్తే
ముందు వరసలో ఉండేది ఆ నిజాలే
అచ్చం నాలాగే ...
.
వెలుగుకోసం అంత ఇష్టం పెంచుకున్న నువ్వు
చీకటిలో ఉండే ఆ నిజాలను నమ్మడానికి
ఒక్కోసారి రోజులు నెలలే కాదు సంవత్సరాలే పట్టొచ్చు
అంత మాత్రాన ఆ నిజాలు చీకట్లో కలిసిపోవు
అచ్చం నాలానే ....
@Lakshmi