ఈ జన్మకు .. ఇలా

+++++++++++
విరుల వానలో కురుల అందాలు
గంధపు చీరకు గులాబీ రేకులు
చీరంచున ఆడే సిరి మువ్వల రాగాలు
జతగాడి జాడకై పరుగిడిన పాదాలు
తమకాన్ని తమలోనే తమాయించుకున్న తడబాట్లు
కాలాల కౌగిట్లో కరిగిపోతున్న ఎడబాట్లు
వెన్నెల రాత్రుల్లో వసంత గీతాలు
మౌన పోరాటాల్లో మనసు ఆరాటాలు ..
కలల మాటున కలవరపాట్లు
మల్లెల మాటున మత్తెక్కిన సయ్యాటలు
ఈ జన్మకు ఇలానే ..
.
రేకుల అంచున వెన్నెల గీతికలు
తీగలనెక్కిన పూబాలల కిలకిలలు
కలువరేకు కళ్ళ కాటుక అందాలు
ఆ కాటుక మాటున దాగిన కన్నీళ్ల కవ్వింపులు
కరిగిపోతాను ఒరిగిపోతాను
ఈ జన్మకు ఇలానే
@Lakshmi

ఆరాధన // మా చౌదరి గారబ్బాయ్ కోసం

ఆరాధన
అవును ఆరాధన
నా మనసు నీ తలపులలో చిక్కుకున్నప్పుడు
అదేంటో తెలుసుకుందామని
ఆవేశంగా నీవైపు రాగానే
ప్రేమగా చూసే నీ కళ్ళను చూడగానే
చెప్పకనే తెలిసిపోయే మధురమైన మైమరపు
ఈ ఆరాధన ……….
.
ఆరాధన
అవును ఆరాధన
అలలు అలలుగా ఎగసిపడే
మనసులోని కోరికలు
నీ పాదాల్ని తాకగానే
సిగ్గుతో తలవంచుకుని
ఒక అడుగు వెనక్కి తగ్గి
పాదాభివందనం చేస్తూ
నీ చేతి స్పర్సకోసం ఆశగా చూస్తున్నప్పుడు
కలిగే వలపు
ఈ ఆరాధన
.
ఆరాధన
అవును ఆరాధన
కౌగిలిలో కరిగిపోవాలని
కలలు కంటూ
వాకిటనే నా తలపులకు కావలి కాస్తూ
మాపటికి నువ్వు తెచ్చే మల్లెమొగ్గల కోసం
మౌనంగా మాట్లాడే భాషే
ఈ ఆరాధన
.
ఆరాధన
అవును ఆరాధన
తొలిజాము కోడికూతకు
మరో ఘడియ మిగిలుందన్నప్పుడు
మనసు మౌనంగా
నిట్టూర్పుల వేడిని వదిలి
నీ నూనుగు మీసాలను
తాకుతూ పరవశించి పాడే పాటే
ఈ ఆరాధన
.

ఆరాధన
అవును ఆరాధన
నా అణువణువునా నిండిన
నిన్ను చూసి ,
నీ మనసే ఈర్ష్య పడేలా
నన్ను నేను రూపాంతరం చెందుతూ
నీకోసం ఇప్పటికి వాకిలిలో
ఎదురుచూస్తూ పడే ఆరాటమే
ఈ ఆరాధన
.
ఆరాధన
అవును ఆరాధన
పొద్దున్నే పూసే మందారం దగ్గరనుండి
సాయంత్రం విరిసే విరజాజి వరకు
అడిగి తెలుసుకో
నీకోసం నీలాకాసం వైపు చూస్తూ
పొద్దుపోయే సమయం కోసం ఎంత వేచానో
ఆ ఎదురుచుపుల ఎరుపెక్కిన కళ్ళ ఆశే
ఈ ఆరాధన
.
ఆరాధన
అవును ఆరాధన
నీకోసం నా మనసు ఎన్నిసార్లు
కూనిరాగాలు తీస్తూ
కునికి పాట్లు పడుతూ
వాలిపోయేపొద్దుని విరహంతో లెక్క కడుతూ
నువ్వొచ్చే వరకు చుక్కలన్నిటిని
చిక్కని మాల గట్టి
ఆ గుప్పెడు మల్లియలని
తడుముతూ ఎదురుచూసే
మెత్తని తలపే
ఈ ఆరాధన
@Lakshmi