వీరుడు :

నెత్తుటి ధారలకెప్పటికీ మలినం అంటదు కామ్రేడ్
వీరుడి మరణం లోకాన్ని నిద్రలేపుతుంది
ఆ ఒక్కడితో ఆగిపోదు విప్లవం
ఎవడో ఒకడు పుడుతూనే ఉంటాడు
నీలోని నిన్ను నిద్ర లేపేందుకు
బ్రతుకు నేర్పేందుకు ..

నువ్వు రాయిగా మారేలోగా
తాను ప్రాణం పోసి
అడవికి దానం చేస్తాడు
నీ దేహమే తుపాకీగా మారి
నడిచే దారిమొత్తం మానవ మృగాల
వెంటాడి వేటాడుతుంది

Lakshmi KN ✊✊

Lock-Down Poetry

పోరాటాలు:
వీధుల్లో దొరికే చౌకయినా ఆవేశాలు
శ్రీ శ్రీ, తిలక్ లు రాసిపడేసిన ఎర్రరంగు కాగితాలు
బ్రతుకుదెరువుకి వలసపోయిన విప్లవ గీతాలు
దారులు మారిన ఉద్యమాల ఆర్తనాదాలు
రంగు తెలియని జెండాల నీడన రాలిపోతున్న ప్రాణాలు

ప్రాణం:
రోధన వేదనల విసిగిన గుండెల ఆక్రోశం
దశాబ్దాల దారిద్య్రం
శతాబ్దాల బానిసత్వం
పునాదులు వీడిన జీవితాల అలసత్వం..

మనిషి :
మారదు లోకం అంటూనే మార్పును కోరుకునే
మాయాప్రపంచపు మౌన గేయాలు
రాతిగుండెల మనిషికి బలయ్యి
రాయిని మొక్కే మట్టి దీపాలు

పాలకుడు:
పచ్చనోటు పాలయ్యిన
రాజకీయ రంగస్థలాన
అరగంట ఆటకు
అద్దెకొచ్చిన ఆర్టిస్టు

కవి :
దస్తాల బతుకు ..
విస్తరాకులో ఉండని మెతుకు
సిరా నిండిన కళ్ళు ..
ఆ కళ్ళనిండా ఏవో వీడని సంకెళ్లు

యవ్వనం:
కవ్వింపులు కలవరింపులు
చీకటిలో పున్నమి కలలు
కలలోనే తెల్లారే జీవితాలు

కోరికలు:
అంతుతెలియని ఆవేశాలు
మూలాలు మర్చిపోయిన
మూర్ఖపు ఆలోచనలు
రంగుల కలలు కని
లేని రెక్కల కోసం
ఉన్న డొక్కల్ని కాల్చే
అత్తరు వాసనల ప్రయాసలు

Lakshmi KN

కామ్రేడ్

నాలో ఆడతనం చూడని తోడు కావాలి
నా ఒంటి ఎత్తుపల్లాలు చూసి మీసం తిప్పని మనిషొకరు కావాలి
కొన్ని దూరాల బరువుని నాతో మోయగలిగే చేయొకటి కావాలి
నిన్ను కాచే శక్తి నాకుందని నమ్మి..
నాలో నిన్ను చూసుకునే మనసు నీకుంటే
రా కామ్రేడ్ కలిసి నడుద్దాం ..
నాచేతులు రక్తసిక్తమయినా..
నీకాళ్లకు మట్టి అంటకుండా చూసే ప్రేమ నాకుంది
పొలిమేరలు దాటి ప్రపంచాన్ని చూద్దాం ..

క్షమించండి అన్నలూ ..

అప్పుడే తెలుసు మాకు
ఆళ్ళకు మేము కవితా వస్తువు మాత్రమే అని
ఆ అక్షరాల భావోద్వెగాలు చప్పట్లకోసమే అని

మీరు మాత్రం ఏం చేయగలరు
మా కోపాలు ఒక చీర కోసమో రవిక కోసమో
ఆశపడి అక్కడే ఆగిపొతే

వంట గదిలో పోరాటమే జీవితకాలం పడుతుంటే
వీధి గుమ్మపు వెలుగు జెండాలు మాకెప్పుడు తారసపడతాయి

క్షమించండి అన్నలూ ..
మీ పుస్తకాల తోబుట్టువులు ఎప్పుడూ రక్తసంబంధీకులు కారు.
@Lakshmi

మట్టి విలువ

ఎక్కడో ప్రపంచం ఉందని కాళ్ళ కింద భూమిని కాజేసే నీకేం తెలుసు మట్టి విలువ
కన్న వాళ్ళ భుజాలను మెట్లుగా మార్చుకుని పైకెక్కే నీకేం తెలుసు మట్టి విలువ
ముప్పూటలా తిని ఏసీ లో ఎంగిలి ఆవిర్ల మధ్య మగ్గే నీకేం తెలుసు మట్టి విలువ 
అక్కడెక్కడో కనపడని ఆకాశమార్గాల కోసం అన్వేషిస్తూ
అయినవాళ్లకు ఆనవాళ్లు చూపకుండా తిరుగుతూ
పండక్కి పబ్బానికి సెలవులకోసం ఏడ్చుకుంటూ వచ్చే నీకేం తెలుసు మట్టి విలువ
.
మట్టిని మాగాణి చేసి మెతుకుకోసం మహాయజ్ఞం చేసేవాడినడుగు
నీ బాటా చెప్పులకంటే వాడి బురద కాళ్ళ అడుగు జాడలు ఎంత బలమైనవో
నీ బెంజ్ కారు కంటే వడ్లు మోసుకొచ్చే వాడి ఎద్దుల బండ్లు ఎంత విలువైనవో
ఎక్కలేక దిగలేక లిఫ్ట్ ఎక్కే నీ మోకాళ్ళనడుగు వాడి వెన్నుపూస ఎంత గట్టిదో
.
ప్రపంచం ఎక్కడో లేదు...
వెతుక్కుంటే
ఇంటిముందు గంటల శబ్దం చేస్తూ నీకంటే ముందే లేచే లేగ దూడ అల్లరిలో ఉంటుంది
ఊరి చివర మంచి నీళ్ల బావి దగ్గర నీళ్లు తోడే నీ మేనత్త కూతురి వోణిలో ఉంటుంది
పొలం గట్ల పై నాటిన జొన్న దుప్పుల మధ్యలోచిన్నగా వీస్తున్న పైరగాలి లో ఉంటుంది
మిరపదోట  మధ్యలో నాటిన ముద్దబంతి పూవు నవ్వులో దాగి ఉంటుంది
అప్పుడప్పుడు వచ్చిపోయే చిరుజల్లులో
ఆగకుండా పారే సెలయేరుల్లో
మనసారా పలకరించే మనవాళ్ళ పిలుపుల్లో
మొక్కజొన్న తోట ఊసుల్లో
ఆ పంట పొలాల్లో ఎక్కడ వెతికినా కనిపిస్తుంది
@Lakshmi

అక్షరాల అర్ధాకలి

++++++++++++++
సంతోషాన్ని వెతికే ధైర్యం లేనపుడు
బాధను మోసే బాధ్యత తీసుకోవాల్సిందే
బలం బలగం బేరీజు వేయలేనపుడు బలి కావాల్సిందే
మార్పు నోచుకోని సమాజంలో
మనిషికి మరణంతోనే మనఃశాంతి.
.
మనసుకి మమతా తెలుసు, మరపు తెలుసు
మమత కు బానిస అయినంత కాలం
మనసు బాధకు బందీ కావాల్సిందే
బందీలకు బలం రావాలంటే బంధుత్వపు రుచులు మరవాలి
.
ఆనాడు నేలను తాకిన ప్రతి కన్నీటి బొట్టుకూ
ఈనాడు లెక్క కట్టి ఋణం తీర్చెయ్యాలి
వరదలై పారిన కన్నీళ్ల ఆనవాళ్లలో 
అడుగులు వేస్తూ కదిలిన కాలానికి  ...
నేడు కాలం చెల్లాలి
చిల్లర బ్రతుకుల దొంతరలు తగలెట్టి
తలకొక్క కొత్త కాగడా వెలిగించాలి.
అసుర దహన కాంతికి
కదనరంగం మరో తూరుపులా కనిపించాలి
@Lakshmi

మళ్ళీ ఆ అలల కలలే

+++++++++++++++++
మళ్ళీ ఆ అలల కలలే
ఆ అలలే కలలై గుర్తొస్తున్నాయి.
ఆ అలలే అక్షరాలై జ్ఞాపకాలని తొలుస్తున్నాయి
ఆ అలలే కనులై గతాన్ని తొంగి చూస్తున్నాయి
ఆ అలలే ముళ్ళై రేపటి దారుల్ని కప్పేస్తున్నాయి
ఆ అలలే కాలాన్ని గుప్పిట్లో బందించి, మనసుకి మరపుని దూరం చేశాయి
ఆ అలలే నిన్నటి కన్నీళ్లను తెచ్చి ఈరోజు గుప్పిట్లో పోశాయి
ఆ అలలే ఆవేదని ఆక్రోశాన్ని మోసుకొచ్చి ముంగిట నిలిపాయి 
ఆ అలలే ఇప్పుడు నాలో చేరి మునుపటికి నెట్టివేయాలనుకుంటున్నాయ్
కానీ
ఆ అలలే నిన్నటి నిజాన్ని చూపించబోతున్నాయ్
ఆ అలలే రేపటి దారికి సింధూరాన్ని అద్దాలనుకుంటూ ఎగసిపడుతున్నాయి
ఆ అలలే నాలోని చీకటి ప్రపంచానికి చుక్కలదారిని కనిపెడుతున్నాయ్
ఆ అలలే నాకు నాలోని నన్ను చూపించబోతున్నాయ్ .
@Lakshmi