ప్రాణం కాదు మానం

ఒకడికి ఇది కావాలి
ఇంకొకడికి అది కావాలి
మరొకడు ఏది కావాలో తెలియక
ఏది దొరికిన పర్లేదనుకుంటాడు

ఎవడికి కావాల్సింది వాడు తీసుకుపోగా
ఇంకా ఏదో మిగిలిందని వేరొకడు వచ్చాడు
వెదకగా వెదకగా దొరికింది , మిగిలి వున్న ప్రాణం
దీన్నేందుకు వదలాలని
దాన్నితీసుకుపోయాడు ఆ మహానుభావుడు .
ఇంకేం
పీక్కుతింటానికి సిద్ధం అయ్యాయి పిచ్చి కుక్కలు ..
వెంట వచ్చాయి రంగేసుకున్న గుంట నక్కలు
ఎమన్నా మిగిలితే చూసుకుని పోదామని
ప్రాణం దీనం గా చూస్తుంది దేహం వైపు ..
పాడులోకం ఎందుకు వదులుతుంది
పీల్చి పిప్పి చేసి ,
ఎముకల గూడుని ఏమి చెయ్యలేక వదిలింది
దాన్నన్నా చూద్దామని వెళ్తుంటే
వాడెవడో వెర్రి వెధవ 120 వేగంతో వచ్చి
ముక్కలు ముక్కలు చేసాడు ..
సైకో గాళ్ళు సన్నాసి వెధవలు
సంబంధం లేని వాళ్ళను కూడా
సాంతం నాకేస్తారు..
@Lakshmi

జై జవాన్ జై కిసాన్

ఇక్కడ జావాన్లు లేరు
కిసాన్లు ( రైతులు ) లేరు

సరిహద్దుల్లో ప్రాణాన్ని కంచెగా వేసి
పహారా కాస్తూ
మేమున్నాం మీ ప్రాణాలకు హామీ
అంటుంటే
ఈ లోపల లోకల్ పందికొక్కులు
దేశాన్ని కొల్లగోడుతుంటే .....
దేశం కోసం పోరాడుతున్నాను
అని ధైర్యంగా తూటాకి ఎదురునిలిచే
ఆ పిచ్చి దేశ భక్తుల త్యాగాలకు
ఎక్కడుంది గౌరవం ..

రోజంతా కష్టపడి రాత్రికి
గుప్పెడు మెతుకులు చేతికి అందినప్పుడు
కళ్ళల్లో వస్తున్న కష్తపు కన్నీటిని
వేగంగా పక్కకి నెట్టేస్తూ
చేతిలో ఉన్నఆ కొద్ది మెతుకులను
ఏ దళారి లాక్కుపోతాడో అని
రేపొద్దున తను బ్రతకక పోతే
తన వారి బ్రతుకు ఉండదు
అని భయంతో తినే రైతుకి
ఎక్కడుంది గౌరవం

వాడి దేహం తూటకు బలయినప్పుడో
వీడి దేహం ఉరితాడుకు వేలాడినప్పుడో
ఒకసారి RIP అని పెట్టేసి
ఎవడి బ్రతుకు ఆడు బ్రతుకుతున్నప్పుడు
ఇంకా ఎక్కడున్నారు జవాన్లు , కిసాన్లు.

నా ముందు నిలబడి రూపాయి ఇవ్వమని
అడిగిన ముసలివాడు
పదెకరాల ఆసామి అని తెలిస్తే
పొలం వదల్లేక ప్రాణం వదిలేవారు
ఎక్కువయ్యారు అని అనిపిస్తే
ఎక్కడున్నారు కిసాన్లు

మా ఇంటిముందు ఉంటున్న యువతి
పెళ్ళైన మూడు నెలలకే భర్తను
యుద్ధం లో పోగొట్టుకున్న
నిర్భాగ్యురాలని తెలిస్తే
ఆమెకు ఆసరాగా నిలవాల్సిన సమాజమే
ఆమె వయసుని ఆశగా చుస్తే
ఎక్కడున్నారు జవాన్లు

మనకు అన్నం పెట్టె అన్నదాతకు అన్నం తినే
పరిస్తితి లేదు
మన ప్రాణాలు కాపాడే సైనికుడి కుటుంబానికి
రక్షణ లేదు
అందుకే చెప్తున్నా .....

ఇక్కడ
జవాన్లు లేరు
కిసాన్లు లేరు
@Lakshmi
https://www.facebook.com/koti.nagalakshmi

బ్రతికున్న భావం

నేను భావోద్వేగాల శవాన్ని
భరించలేని భాధయినా
చెప్పలేనంత సంతోషం అయినా
నేను చలించకూడదంట
సమాజం లో చట్టాలు
అలా రాయబడ్డాయంట
ఈ చట్టాల్ని నేను పట్టించుకోక పోతే
అవి నన్ను బ్లాక్ మెయిల్ చేస్తాయంట .
సమాజంలో నుండి వెలివేస్తాయంట
మా గురువుగారు చెప్పారు
ఎంత ఆపినా
ఏదో ఒక అమావాస్యనాడు
నా ఆలోచనలు
నక్కల ఊళలో కలిసి
ఏడుస్తాయి
ఎంత ఆపినా
నా సంతోషం
ఏదో ఒక పౌర్ణమి లో
కలిసి చల్లని వెన్నెలలో నాట్యం చేస్తుంది
నా ఆలోచనల్లో ఎప్పుడో
ఈ సమాజం మరణించింది
నేనే దీన్ని ప్రతిసారి హత్య చేస్తున్నాను
నన్ను ఆపలనుకున్న ప్రతి సారి
నేను దీన్ని పొడిచి పొడిచి చంపాను
అయినా
నేను ఈ సమాజం ముందు
జుట్టు విరబోసుకున్న
ఆత్మ లాగానే కనిపిస్తున్నాను
నన్ను చంపలేక
తాను చచ్చిన సంగతి తెలియక
మూలాన కూర్చొని
మూలుగుతున్న ఈ సమాజాన్ని
నేనెప్పుడో వేలివేసాను
@Lakshmi

మాకెందుకు స్వాతంత్రం

స్వాతంత్రం పేరు చెప్పి
అడుగు బయట పెట్టగానే
అర లీటరు యాసిడ్ పోసేట్టయితే
మాకెందుకు స్వాతంత్రం
పెద్ద చదువు కోసం
ఊరు దాటగానే
వోణి పట్టి లాగేట్టయితే
మాకెందుకు స్వాతంత్రం
ఉద్యోగం కోసం పక్క ఊరికేల్తే
మానం పోగొట్టుకునేట్టయితే
మాకెందుకు స్వాతంత్రం
మనువు పేరు చెప్పి
మనసివ్వలేని వాడికి
తనువుని తాకట్టు పెట్టాల్సి వస్తే
మాకెందుకు స్వాతంత్రం
బాధ్యతల పేరు చెప్పి
బంధాల ముడులు వేసి
బంధీని చేస్తున్నపుడు
మాకెందుకు స్వాతంత్రం
పురిటిలోనే నాజాతిని
నరకయాతన పెట్టి
వీధి కుక్కల పాలు చేస్తున్నపుడు
మాకెందుకు స్వాతంత్రం
బానిసలుగా అలవాటుపడ్డ మాకు
స్వాతంత్రం పేరు చెప్పి
కొత్త ఆశలు పుట్టించి
సరికొత్త హింసలు
బహుమతిగా ఇచ్చేట్టయితే
మాకెందుకు స్వాతంత్రం

@Lakshmi

మార్చుకున్న తలరాత

ఆమె తిరిగొచ్చింది
చేతులు విరిగాయని కొందరంటున్నారు
కొత్తగా రెక్కలోచ్చాయని మరికొందరంటున్నారు.
అక్షరాలతో ఆడుకునేదేగా అని పలకరించబోయాడొకడు
ఆయుధం పట్టిన సంగతి అర్దమవ్వలేదేమో మరి
ఆమె నిజంగానే తిరిగొచ్చింది
కాలువలు గట్టిన తన కన్నీటి సుడిగుండాల్లో
కొట్టుకుపోతుందనుకున్నారు అందరు.
ఎలా వచ్చిందో, ఎందుకొచ్చిందో అర్ధంకాక
ఆమె వేస్తున్న ప్రతీకార లెక్కల్లో
ఎవరి వంతు ఎప్పుడొస్తుందో అనుకుంటూ
వాళ్ళ వాళ్ళ  పాపాల లెక్కల్ని బేరుజు వేస్తున్నారు.
ఈ వరుసలో ఎవరు ముందున్నారో మరి ?
వరుసలో ఎవరు ఎక్కడ వున్నా
వేయబోయే శిక్షలో మార్పులేదు.
కోపంతో ఎరుపెక్కిన కళ్ళను
నల్లటి కళ్ళద్దాలతో కప్పేసింది.
నిన్నటి ఆమెలో వున్న భయం బాధ
ఈరోజు వెతికినా కనబడడం లేదు.
ఆమె తిరిగొచ్చింది
ఆమె తన గతానికి సమాధానం చెప్పడానికి వచ్చింది
రేపటికి స్వాగతం చెప్పడానికి వచ్చింది
@Lakshmi

నా కోట్లకు పునాది నీ ఆకలేరోయ్

******************************
నాకెందుకు ఇదంతా
అయినా నీకు సేవ చేయాలనుంది
అందుకే
నీ గురించి పుస్తకం రాస్తా
ఒక్కో పుస్తకాన్ని 10 రూ/- అమ్ముతా
1000 పుస్తకాలకు 10000 వేలు వస్తాయి
వాటితో నీ గురించి షార్ట్ ఫిల్మ్ తీస్తా
దానితో లక్ష రూపాయలు వస్తాయి
వాటితో నీకోసం ట్రస్టు పెడతా
విరాళాలు కోట్లలో వస్తాయి
ఆ కోట్లలో ఒక లక్ష నీ పేరు చెప్పి
ప్రెస్ మీట్ పెట్టి
నీలాగే మావాడికి వేషం వేసి
దానం చేస్తాం
దాంతో రాజకీయాల్లోకి అడుగు పెట్టేస్తా
నీ పేరు చెప్పిప్రభుత్వం నుండి వచ్చే
గుడి, బడి, తిండి, గుడ్డ అన్నీ
నా కడుపుకే..
రిజర్వేషన్ నీది రాచరికం నాది
నీపేరుతో నాకు పద్మశ్రీ లు
పద్మ భూషణ్ లు ..
హ హ నీకు మాత్రం
ఆ పూరి పాకనే...
నాకు కోపం వస్తే
ధర్నాలు, రాస్తారోకులు
నువ్ అడుక్కు తినడానికి కూడా
నా కనికరం వుండాల్సిందే ..
అయినా ఇదంతా నాకెందుకు
నా బ్రతుకు నాది
నీ బ్రతుకు నీది
కాని నా కోట్లకు పునాది మాత్రం నీ ఆకలేరోయ్ ...
.
@Lakshmi

పాత పలక

ఏడేళ్ళ వయసు అంటే
బడి, ఆటలు పాటలు, స్నేహితులు
ఇది అందరికి తెలిసింది...
కాని వాడిది దోవ వేరు,
పొద్దున్నే లేచి
అయ్యోరి పొలానికి గంధకం కొట్టి ,
గొడ్ల సావిడి శుభ్రం చేసి ,
అమ్మ కాసిచ్చే
ఆ కొద్ది గంజి కోసం
వాకిట్లో దొంతి కూర్చొని
ఉన్న ఒక్క చొక్కాకి బొత్తం
కుట్టుకుంటున్నాడు.
సూది చేతిలో గుచ్చుకుంటున్నా
వాడికి తెలియదు ,
వాడు ఈరోజు బడికి పోబోతున్నాడు
మొట్ట మొదటి సారి బడికి పోతున్నాడు
నిన్న రాత్రి నుండి కలలు కంటున్నాడు
అమ్మ గంజి కాసిచ్చే వరకు కుడా ఆగలేక
చొక్కా తొడుక్కుని
అయ్యోరి పిల్లాగాడి పాత పలక
శుబ్రంగా కడుక్కుని చంకలో పెట్టి ,
బడికి సిద్దమయ్యాడు ..
ఎండుకు పోయిన కడుపు
వాడికి దారికి అడ్డు రాదు.
చిరిగి పోయిన చొక్క
వాడి ధైర్యాన్ని దేబ్బతీయలేదు..
ఎగిరెగిరి పడే వాడి అడుగుని
గులక రాళ్ళు ఆపలేవు ..
ఒక్క బానిస బ్రతుకుకి
వాడి బాల్యాన్ని బలిచేసే
పెత్తందార్ల స్వార్ధం తప్ప ..
.
@Lakshmi